مين بيحس بيك .. مين تكلمه
مين دمعة عينيك .. ممكن تألمه
ما إنت عايش لوحدك مع إنك وسط ناس
عايشيين مع بعض لكن عايشيين كدا وخلاص
خايف مايحسنيش.........................
خايف أعيش حياتى علشان لازم أعيش
حتى إللى فاكرها روحى وهى كل الحياه .. سابتنى أقول لروحى تعبت من الحياه
أولاً الكلمات إللى فاتت دى دويتو بين عمرو دياب وجورج وسوف !!! سمعتها بالصدفه على موبيل عزيزه( بنت خالى) ... ماعلينا بقى شوية كأبه وجايز هنوصل لشوية تهريج ... ليه لأ !!؟
بصراحه الكلمات شدتنى جداُ رغم إن مكان النقط فيه كلام بيقولوا جورج ودانى مميزتوش!! بس حسيت إن الكلمات القليله دى حددت اغلب أو كل الأسئله إللى جوايا بشكل عام وجوه أى حد بشكل عام بردوا
أنا أصلا يوم ماعملت البلوج دى مافكرتش انها تكون موضع اهتمام او معرفه من اى حد لأنى أنا كنت عاملاها كفضفضه مع نفسى .. أحكى فيها وكإنى بكلم ناس كتير أو كإنى بكلم شخص بعينه أو بكلم نفسى ..!!! ليه لأ ؟ كنت عاوزه اقول أسامى وأحكى ذكريات بوضوح
كنت عاوزه ابطل موضوع انى أقول اللى مزعلنى على ورق بإمكانى أقراه كل وقت وفى أى وقت كنت عاوزه اكتبها بعيد عن متناول ايدى علشان مش كل شويه أقرا اللى مدايقنى وإن بالصدفه وأنا بلعب فى الأجنده او بدور على ذكرى كويسه .. وبعدين قولت وليه ما أخدش بنصيحة من نصحنى فى الماضى بإنى أتكلم مع كائنات حيه بشر يعنى بدل الجماد .. ومن هنا عطيت لأصحابى عنوان البلوج .. منهم إللى اهتم ودخل ومنها من تناولها كعابر ومنهم من لم يلقي لها إهتمام .!! ولكنى ما أنكرش إن فيه ردود بتريحنى بشكل أو بأخر
المشكله تتلخص فى إيجاد شخصيه واحده تحقق كل اللى بالأحمر فوق ده .. تنزع الخوف .. احس إن الكلام لو له معنيين إللى قدامى حيفهم إللى عاوزه اقولوا من غير ما أوضح او أشرح
ممممممممممممممممم أقولكم حاجه مش قادره ما أقولهاش ... بس من غير زعل ولا لوم عليها ... أنا فعلاً حسيت مؤخراً أو بمعنى أدق إتأكد إحساسى إنى للأسف مالقتش صديقه صدوقه.. يوم ما أطلب منها نصيحه أخدها ثقه .. يوم ماتوعدنى توفى .. ما انكرش إن فيه صديقتين كنا المفروض كدا.. لكن .. لـــيتنا كــالأسماء لا يـغيرنا الزمن
مجرد تخيل بسيط كدا ع الماشى .... عايش طول حياتك سعيد بالفعل وحب الناس ليك مريحك نفسيا وحاسس بصدقهم وحاسس إن الدنيا يخيروغن اللى يقول غير كدا شخص حقودى وسوداوى جدا .. فجأه .. تلاقى المواقف والظروف بتكشف وشوش .. وشوش ل ناس المفترض إنك تعرفهم ولكن الوشوش بتختلف !! .. دايماً نقول محدش إختارأمه وأبوه .. طيب والناس إللى تم إختيارهم بإرادتك وإخترتهم بنفسك.. يعنى حتى قدرتك على الإختيار زفت وفاشله :) تفرح بنفسك وقتها !!؟
كنت قريت حاجه كدا عن الفشل والإكتئاب وأقدر ألخص كلوا فى المثل الشعبى القائل " إللى يشوف بلاوى الناس تهون عليه بلوته".... وبصراحه هى بتهون لكنها مش بتزول
المهم إنى كنت واحده من الناس إللى أكره إنى اكون ضعيفه أو اعترف بكدا ولا زلت كدا !!! رغم إللى بكتبوا ده بس يمكن لأنى كنت بقدر أتغلب على كل حاجه وادور على إللى يعوضها يعنى كانت جدتى (الله يرحمها ) وأصدقائى وشخصيه ما كان وجودى معاهم بيهون حاجات كتير جداً .. حالياً ... جدتى الله يرحمها :( .... الشخصيه ما ممنوع الحديث عنها أو النشر او التصوير !!! .. أصدقائى :( لم يعُد وجودهم فى حياتى بالأمر المُريح !!
كنت كمان مش بحب أفكرش كتير فى اى حاجه أو يمكن كان تفكيرى اعلى من دلوقتى !! يعنى اكون عكس الناس كل ما أكبر مستوايا العقلى بيقل!! وليه لأ كل شئ جايز والدليل إنى قررت انسحب وما أوجعش دماغى ب فلانه اتصرفت بإسلوب دايقنى او دى ماوفتش بكلامها او دى كدابه او دى او ده او او وقولت ألتزم بالحكمه القائله " إن لم تكن الوحده عباده .. فهى إلتعاد عن الشرور " ولكنى إحترت فى المقوله دى !! .. لأن الوحده ماطلعتش إبتعاد عن الشرور ولا حاجه دى طلعت مركز الشرر !! .. الكل يبدأ يلقى الإتهامات على الفرد إللى قرر يكون لوحده منعاً للمشاكل أو يبدأ مايدايقش من إللى يدايق ويكبر دماغه ويبدأوا يتهموك بإهمالك لحاجات.. والأصحاب بدل ما يكونوا جنبك بشكل فعلى بتحس إنهم مُجرد ديكور !!او بمعنى ادق إنت إللى ديكور فى حيااتهم.. وبدل ما يخرجوك من الخنقه دى بيزودوها !! هوووووووب بقى تلاقى نفسك فى منبع من الضغوط من البيت وبره البيت وأصحابك وبُعدك عن حبايبك وضغط جامعه وواجبات عليك تجاه ناس كتير وزيارات عائليه وغيره وغيره وتحاول تحل الضغوط دى كلها بإيدك وتقول محدش حيخاف عليا أكتر منى تلاقى كل ما تحاول تقف على رجليك حد يقوم موقعك .. وتحاول تقف تانى وتالت ورابع وهو بردوا يوقعك !! رخامه بقى .. بس بردوا تفضل تحاول وتحاول إنك تكون شئ والغريب إنى وسط الضغوط دى
لا أذكر سوى شخص واحد فقط .. شخص يظن أنه بالبعيد ولكنه قريب .. شخص تمكنت أنا من تحديد من معالمه ولكن معالمى لديه مشوهه .. طلبت مراراً وقف الإقتتال بيننا .. ولكن لا جدوى !!" ... ألا وهو .. الذكريات أو لنقل نفسى
إحم .. كان فيه كلام كدا إتبعتلى على الميل وأكتر اللى عجبنى الجزء ده
كم تضحك الدنيا وتبكي أسى
كم تضحك الدنيا وتبكي أسى
ونحن لا نبكي ولا نبسم
فلم يعد يضحكنا مضحك
و لم تعـد آلامنـا تؤلم
أضاعت الأفراح ألوانها
وفي عروق الحزن جف الدم
حبيت بس أحتفظ بيها وأختم بيها :)
هناك ١٠ تعليقات:
محتمل يكون الموضوع خاص بينك وبين أصحابك بس الأكيد إن دى سحابه سودا ماتعمليش قدامه ستوب عشان ما تخسريش معرفة الناس ومعرفة الناس كنوز وابن ادم خطاء
ماتضغطيش على اعصابك
الكبت بيولد الإنفجار
حكيم زمانى
بجد عجبنى اوى كلامك وحاسيته اوى لان دى هيا الحقيقه ان الواحد بقى وسط الناس وحيد!!! ومفيش شك بردوا ان الناس الى قريبه بقت بتغدر من غير سبب .
والناس الى بنعتبرهم قريبين بيكونوا ابعد مما نتخيل !!!
بس النهايه ايه العمل؟؟؟
بنتعامل بس الواحد لسه بيحاول يدور على ناس فيها طيبه00وتحس بغيرها من غير ميتكلم 00ومتغدرش ,
لان فعلا الطيبه بقت تضيع منا 00000
NaryTom
كلامك 99% منه حقيقى وال 1% دورى عليه بين الناس اكيد فيه شخص معين فيه يقدر يحقق لك كلام الاغنيه وانا مساغرب ازاى عمرو وجورج فى اغنيه دول صوتيين مختلفين خالص
عبرت كعابر
هاى شيمووووووو
وحشتينى اوى
كلامك مظبوط والله الغدر من الصحاب بقى كتير اوى
بس لو كل الصحاب من العينه دى يبقى كلنا مش أصحاب وكل شخص يقف وواخد حذر من صاحبه وماسكله سكينه
انتى اول واحده اعرف منها الفرق بين الصديقه والزميله والصاحبه والاخت الصديقه
وانا بوافق حكيم زمانى فى رأييه
صفاكس
محتمل يكون الموضوع خاص بينك وبين أصحابك بس الأكيد إن دى سحابه سودا ماتعمليش قدامه ستوب عشان ما تخسريش معرفة الناس ومعرفة الناس كنوز وابن ادم خطاء
ماتضغطيش على اعصابك
الكبت بيولد الإنفجار
حكيم زمانى
17/02/07 01:05
___________________
حكيم زمانى البلوج عامه ومافيش فيها خصوصيات مادمت انا قولتها
صدقت فى كلامك وحكمك يا حكيم .. وفعلا الضغط بيولد الانفجار .. وانا مقتنعه بكلام حضرتك
إن شاء الله اخرج من الحاله دى بأقل خسائر بس إنت ادعيلى
بجد عجبنى اوى كلامك وحاسيته اوى لان دى هيا الحقيقه ان الواحد بقى وسط الناس وحيد!!! ومفيش شك بردوا ان الناس الى قريبه بقت بتغدر من غير سبب .
والناس الى بنعتبرهم قريبين بيكونوا ابعد مما نتخيل !!!
بس النهايه ايه العمل؟؟؟
بنتعامل بس الواحد لسه بيحاول يدور على ناس فيها طيبه00وتحس بغيرها من غير ميتكلم 00ومتغدرش ,
لان فعلا الطيبه بقت تضيع منا 00000
NaryTom
20/02/07 02:20 م
____________________________
يا حسانى يا ناريمان ..
وعلى رأيك والله الواحد لازم يتعامل رغم كل ده.. بس المشكله ان فى النهايه بتلاقى نفسك عاوزه تنفجرى وبتنفجرى فى نفسك
وكلا الحليين صعب تحقيقه والمشله انه مابقاش ينفع تنعزلى عنهم
نعيب زماننا والعيب فينا .. وما لزماننا عيب سوانا
كلامك 99% منه حقيقى وال 1% دورى عليه بين الناس اكيد فيه شخص معين فيه يقدر يحقق لك كلام الاغنيه وانا مساغرب ازاى عمرو وجورج فى اغنيه دول صوتيين مختلفين خالص
عبرت كعابر
______________________
ممممممم ياريت نلاقى الواحد فى الميه ده بس هو اكيد اكتر منكدا بس تايهيين بين الناس
والله مش عارفه انا عجبتنى الكلمات رغم انى بردوا استغربت زاى الاتنيينن يجتمعوا فى اغنيه
شرفنى مرورك يا عابر
هاى شيمووووووو
وحشتينى اوى
كلامك مظبوط والله الغدر من الصحاب بقى كتير اوى
بس لو كل الصحاب من العينه دى يبقى كلنا مش أصحاب وكل شخص يقف وواخد حذر من صاحبه وماسكله سكينه
انتى اول واحده اعرف منها الفرق بين الصديقه والزميله والصاحبه والاخت الصديقه
وانا بوافق حكيم زمانى فى رأييه
صفاكس
____________________________
لأ يا صفاكس مش ده قصدى نهائى .. انا ما قولتش ان حد يقف للتانى بسكينه ورا ضهره يبقى كدا اسمهم اعداء مش اصحاب
وانا ماقولتش ان كل الناس كدا وماتنكريش ان فيه صديقه قريبه جدا منك خانتك او عملت تصرفات غريبه او ن فعلا بين الناس مش بتحسى بالغربه
دى مواقف الكل بيمر بيها وبتحصل .. أكيد فيه ناس كويسه ياريتهم يكونوا كتير
انا بس حكيت حاله انا بعيشها حاليا وخنقانى فعلا .. ومتاكده ان كتير مروا بيها او بيمروا بيها ولكن قدرة الانسان على التحمل مختلفه من شخص للتانى
فاهمانى يا صفاكس؟
فاهماكى يا دوشه بس افتكرى مثال نص الكوبايه المليانه وخدى الحكمه من افواه المجانيين والشحاتيين
طبعا فاهمانى
رغم من انى بعانى نفس همومك ومشاكلك بس مش عارفه انتى قلبتى عليا المواجع وفى الاخر يقولوا البنات معقديم ماهو من الضغوط والتوتر والحمول اللى على اكتافنا ربنا يهون عليكى وعليا
اختك فى الاسلام
إرسال تعليق