إغـــــــــلاق أبدى

مغلقه للأبد إن شاء الله
قرار لا رجعة فيه
رغم انى اصلا قولت كتيييير مش عاوزه المدونه تانى لانى مش بدخل مكان دخلوا غيرى ودنسه وبردوا رجعوها ..
يوجب عليا الشكر لأحمد .. شكرا تانى يا احمد
ولكن المدونه انتهت بالنسبالى من يوم الاحد ودون رجعه

أنــــا من عشرين سنه

شوفتونى وانا لسه ماكملتش سنه؟

أد إيه وحشتنى انا
يااااااااااااه
وحشااااني يا أنا

ياللى كنتي من عشرين سنة

تعالي شوفي حالي و قوليلي مين انا؟

تعالي شوفي مين كنتي عايزة تبقى..بعد عشرين سنة

كنتي عايزة تبقى انا؟؟؟؟؟

و انا عايزة ابقى انا ؟

بسس....من عشرين سنة

وحشاني يا أنا ....

وبتمنى نرجع سوا يا أنا

محتاجه أحس بيكى
وأرضى عن اللى وصلتلوا يا أنا

وحشاااانى اوى اوى يا أنا .. محتاجه أعرف أحلامك كانت إزاى من عشرين سنه

ياترى يا أنا
كنتى عاوزه تبقى أنا؟

شر البلية ما يضحك

حاجة تحزن فعلا

اعتقد دلوقتى اكتر من 50 سنة كمان :(

تفتكروا دم الحيوانات هيكون مضمون ؟
بما إن دم البنى أدمين إنعدم

طبعا مش كل الشباب كدة...انا عاوزة حد يعملى المذاكرة كدة :)

وقت الجد..ولا نعرفكم

الوظائف الحكومية والروتين

يا سلام على البراءة

احنا فين ؟

:(براحتك يا باشا

بتحصل فعلا

بنطبق التراث العريق

احدث الوسائل :D

أيــوه بـــانوا

الراحله سعاد حسنى .. مؤكد انى مش حتكلم عنها لأنى مش حعرف أعبر أد إيه انا بحبها وبعشق أغانيها اللى لما حد يقلدها مش ممكن يقدر يقلد نفس الأداء ...

مش عارفه امسك نفسى عن انى احط اغنية بانوا بانوا بجد تحفففففه

أسيبكوا مع الكليب

بـــانوا بـــانوا ... فيلم شفيقه ومتولى

1. ودى الكلمات ..

:

:

:

بانوابانوا بانوا على أصلكوا بانوا

والساهى يبطل ساهيانوا

ولا غِنا ولا سيط دولا جنس غويط

وكتابنا يبان من عنوانه

بانوا أيوه بانوا

****

جربنا الحلم المِتعايأ ابو دم خفيف

وبقينا معاه إخوه شقايق .. فاكرينه شريف

أتاريه مش كدا على طول الخط

الطبع الرضى من جواه نط

خلاص بقى مهما إنشال وإنحط

مافيش دمعة حزن عشانه

بانوا أيوه بانوا

****

وعرفنا سيد الرجاله

عرفنا عين الأعيان

من بره شهامه وأصاله

بتشوفوا تقول أعظم إنسان

إنما من جوه ياعينى عليه

بياع ويبيع حتى والديه

وأهوا ده اللى اتعلمناه على إيديه

القهر وقوة غليانه

بانوا .. أيوه بانوا

بانوا بانوا بانوا على أصلكوا بانوا

بانوا أيوه بانوا

****

دوروا وشكوا عنى شويه كفايانى وشوش

ده أكم من وش غدر بيا ولا ينكسفوش

وعصير العنب العنابى العنابى

نقطه ورا نقطه يا عذابى يا عذابى

يكشفلى حبايبى وأصحابى

يوحدنى وانا فى عز شبابى

القلب على الحب ينادى والحب بعيد عنه

بانوا .. أيوه بانوا

أهو كدا بانوا على أصلكوا بانوا

عمــــر السعاده ..

مر عابر سبيل علي مقابر أحدي القرى وتعجب من قصر أعمار أهل القرية

فقد كتب علي كل قبر عمر ساكنه

(من يرقد هنا عاش 10 شهور )

وهذا 5 شهور

وهذا شهر

وهذا اسبوع

وهذا يوم

وهذا ساعة

فذهب الي شيخ القرية ليسأله عن سبب قصر أعمار أهل القرية

ربما السبب انتشار طاعون ما

فأجابه الشيخ: إن ما كتب علي هذه القبور ليس أعمار ساكنيها ولكن عمر أوقات السعادة التي عاشوها

فأهل القرية لا يحسبون أعمارهم بعدد الايام والسنين التي عاشوها ولكن بلحظات السعادة التي حظوا بها

ياتري لو حبيت أحسب عمري بطريقة أهل هذه القرية هكون اتولدت ولا لسه !!!؟

thanatos

يفترض فرويد أن لكل فرد رغبه لا شعوريه فى أن يموت ..وغريزة الموت هى التى تدفع الفرد الى التدمير والعدوان والحرب وإلى كل ما من شأنه أن يقربنا من الموت والفناء ، وحيث ان الهدف الاخير لكل كائن حى هو الرجوع إلى الحاله غير العضويه لذلك يفترض فرويد وجود دافع غريزي لدى الكائن الحى للرجوع إلى الماده الأولى الجامده وغير الحيه وبما ان كل حى يموت نتيجه لأسباب داخليه أى يعود إلى الماده الجامده إذن " فالموت غاية كل حى " ومن أقواله أن " هدف الحياه هو الموت " وأن " الحياه طريق دائرى لبلوغ الموت " وذلك لأن الميت قد وجد قبل الحى

:

:

:

:

القطعه دى جزء من ماده مقرره عليا فى الكليه إسمها أصول الصحه النفسيه .. مش أول مره أفتح الكتاب أكيد فتحته فى إمتحانات الشفوى فى الكليه لكن أول مره أتصادم مع الجزء ده فى الكتاب .. اول شئ شدنى ان فيه غريزه للموت - وصلت لسنة الليسانس ومش عارفه ان فيه غريزه للموت !! - لكن اللى فى اول ما قريت الجزء شدنى هى جملة هدف الحياه هوا لموت هل معقول ان يكون واحد عايش وهدفه إنه يموت ؟؟ طيب ما كان من اول ما اتولد جاب خنجر مسموم وموت نفسه وحقق هدفه وخلاص ولا كان قعد فى بيته وولا اتعلم ولا مارس حياته واستنى الموت مادام ده هدفه

ولن أنكر إطلاقاً إن جملة أن الميت وجد قبل الحى كمان فى الاول جذبتنى وقولت ازاى بس الظاهر إن إزاى دى كانت تبع حالة السطل اللى بعيشها او يمكن انا عمرى ما فكرت فى ان اخر مرحله فى الخلق هى بث الروح فى الجسم فبالتالى ان مرحلة ماقبل البث دى كنا ميتين فيها .. الله اعلم تفكيري ده صح ولا غلط ..

بس بجد فرويد ده دمااااغ انه فكر فى كل ده

فـــــــــ مذاكره ـــــاصل

ها .. نذاكر بقى

ونلتقى بعد الفاصل المزعج الخاص بالمذاكره والامتحانات

مممممممممم

لعبنا كتير .. طول السنه رغم انها ليسانس وإحنا بنلعب وننام ونخرج وتليفونات بالنهار ونت بليل وحالتنا زفت ولا حتى كنا بنروح الكليه زى كل سنه.. وتقريبا الدكاتره كانوا بيشحتونا علشان نروح

المهم بقى .. نتلم ونذاكر أحسن لنا ..

:) قولت أديكوا جرس علشان تصحوا من النوم فى العسل

ولأنى مش بلاقيكوا اون لاين وانا اون لاين او بكون مشغوله وبفرقع فقولت أقول هنا

مش لصحابى وبس اللى فى الكليه ..لكن لكل اللى بيبدخلوا هنا

نذاكر بقى

لعبنا كتير .. وقولنا كتير حنذاكر ونقعد نت عادى حنقدر نظبط مواعيدنا لكن الحقيقه مش بيحصل ..

وإتلككنا كتير بحالتنا النفسيه

وما افتكرش انها اتغيرت كتير لكن وقت الجد بدأ من زمان .. بس أهو بدأ متأخر معانا والامتحانات فاضلها حوالى اقل من اسبوعين .. فنذاكر بقى

انا لسه نفسيا ما اتظبطش بالعكس الحاله بقيت انيل .. علشان كدا لازم تدعولى بذمه بقى ان ربنا يهون المصايب عليا انا لن اعترض على القدر

-انا مين اصلا علشان اعترض على القدر -

ولكن بجد محتاجه دعواتكم اوى فى الصلاه وفى الفجر وفى كل وقت اللى عنده جده يخليها تدعيلى :( بالله عليكى يا بت يا انجى خلى جدتك تدعيلى وانتى يا ناريمان خلى مامتك وجدتك يدعولى

:( روحوا ذاكروا بقى

أصدقائى ... بحبكم فعلا

أول مره حكتب عن حد من صحابى فى البلوج ... وما اعتقدش انها حتكون اخر مره لأن ليا أصحاب فعلا يستحقوا أرفع قدامهم القبعه

وأحترمهم وأحترم عقولهم جدا وأحترم وأوفى لذكرياتى معاهم .. ممممممم يمكن فيه حد من أصحابى زعلان منى وانا مش حاسه فبقولهم انى أكيد مقصدش ازعلهم وده شئ هما المفروض يكونوا واثقين منه تماماً .. ولكن اللى زعلانه وعارفه وحاسه بيها هى سميه صديقتى مممممممم مع ان الزعل مش منى ولكنها زعلانه منى بردوا عادى انا بعمل كدا كتير بأجى على اللى منى وأقرب الناس ليا لأنى واثقه انهم حيتحملونى وحيقدروا حالتى .. وعرفت أصحابى اللى بجد فىا لفتره اللى فاتت وهما جنبى فى أسوا حالاتى النفسيه... بجد انا احترت ازاى أعمل شئ يسعدها بس افتكرت الخاطره دى كانت عاجباها وكانت عاوزه تكتبهالى لما كنت انا زعلانه منها فانا بهديها لها وبتمنى انها تقراها ومعروف انها مش بترد فى البلوج فمش حستنى رد .. وبدعى ربنا يفك كربها ويريحها فى حياتها ويسعدها ومايبعدش البسمه عن شفايفها أبدا أبدا .. واى حد تانى زعلان منى انا بهديهم الخاطره دى .. ل أحلام الفرحاتى

نخلينا فى الخاطره بقى

يا رفيق الدرب فكر قبل أن تنوى الرحيل

مابقلبينا صديقى ليس بالشئ القليل

قد أتينا من دروب الخوف للحب الجميل

هل ترانا قد جُننا أو طلبنا المستحيل !!؟

أم نسينا كيف نحمى الحلم من برد الشتاء

ونحتنا من جبال الثلج بيتاً فى العراء

يا رفيق الدرب فكر قبل ان تنوى الرحيل

قبل أن تنوى العداء

حُبنا أعطانا حُنواُ يا صديقى لا جفاء

ما بالنا نرديه ظلماُ فى جحور الكبرياء

ما ادعينا الحب يوماُ ..

أم ترى ..

كان إدعاء ..!!؟

الممنوع مرغوب

الممنوع مرغوب

حكمه أو مثل من كلمتين لخصت كلام كتير وحيره اكتر

يمكن سؤال تافه ويمكن البوست لكوا تافه ولكن فعلا السؤال فاجأنى حالا والجمله مصممه تتردد جوايا

هو ليه الممنوع مرغوب؟

هل فضول؟

هل حب تملك؟

هل محاوله من الإنسان إنه يثبت مدى تفوق قدراته؟ يعنى مجرد محاوله لإثبات الذات؟

طيب والفشل .... إيه أثره؟

ليه مش بنفكر فيه قبل ما نفكر فى ا لممنوع؟

ليه بندور على الممنوعات سواء بثقافة مجتمع أو ديانه ونحاول ندور على مخرج لحذفها من قائمة الممنوعات !!؟

هل دى طبيعه بشريه ؟ مممم ممكن .. لا أكيد.. مش عارفه

طيب انا مثلا لو الممنوع المرغوب ده حلم بحاول أفهمنى إنه حلم أكيد بدايق .. بس بحاول أرجع أحدد قدراتى إيه وأعيد تنظيم الحلم لكنى مش بلغيه

لو الممنوع المرغوب إنسان .. بفتكر جزء من أغنية فيلم ظرف طارق ( مستنى إيه إمشى .. الحلم ما نفعشى..فوق من خيالك فوق إنسى بقى وإمشى) وأعرف إن ده الطبيعى زى ما ناس عاوزانى فى حياتها وانا مش عاوزاها ومش حيريحنى وجودهم فى حياتى أكيد لازم أتقبل الوضع البديل

ممممممم أقفل على كدا أفضل

البهلوان يبكى

طول عمرى عارفه إنى شخصيه مُتقلبة المزاج بشكل كبير.. شئ لا إرادى عندى وغير مُحبب بالنسبالى بكل المقاييس وإن كان زاد بشكل غريب فى الفتره دى وأصبحت غير مستقره فى أى وكل شئ.. ولكنى ماتوقعتش إن التقلب ده يوصل لأفكارى .. بجد ما أعرفش إيه اللى جرالى..

المذاكره بينى وبينها نفور.. كان يوم ما أستلم كتب الكليه - إحنا بنستلم الكتب دفعه واحده وبتكون قبل الامتحان الشفوى بإسبوع كداولكن استلمناها المره دى بدرى عن الشفوى اوى- كنت بحس وكإنى حصلت على كنز ما وأبدأ أقرأ فيهم مجرد قراءه من غير إلتزام بالمٌقرر .. يعنى مجرد رغبه فى معرفة الجديد .. لكن .. لأول مره أستلم الكتب وأسيبها " مرميه" عالسرير وفى معاد النوم أشيلها - وأعيد رميها - عالمكتب وتظل على حالها - مرميه على المكتب- أكتر من اسبوعين دون النظر لها او محاولة النظر للفهرس وأخيراً ليلة أمس تم إلقائها فى الدرج محافظةَ على الشكل العام للغرفه .. طبعا بعد نزع كتب الترم الاول ووضعها أفقياً فى المكتبه بجوار نظيرها

بجد مش عارفه فين فضولى للكتب دى؟
تفحصت حالى لاقيتنى لا شعورياً أصبحت أكره كراهيه عمياء الجامعه بصفه عامه والكليه بصفه خاصه والقسم بتاعى بصفه أكتر خصوصيه !! فى حين إن الجامعه والكليه والقسم كانوا حلمى من زمان ... لا أذكر إنى أبداً فى يوم كنت أتمنى كليه اخرى أوجامعه اخرى .. بس وانا فى إبتدائى كنت عاوزه اكون قسم لغه عربيع ولكن عندما - إختار لى - عميد الكليه نظراً لحدوث مشاكل ذلك القسم فلم أكن أكرهه لأنى حينها كنت بحب القسمين علم النفس واللغه العربيه وإن جاء أحدهما ففى كلا الحالتين أكون أخذت ما أردت ...ولكن كيف أكره ما أردت؟!! .. أيُعقل؟

تفكيري بقى غريب أوى .. بقيت بزهق بسرعه .. قوة تحملى لأى فرد شبه مُتلاشيه .. بجد ماكونتش كدا

فاكره كويس أوى إن هدفى لحد السنه اللى فاتت انى اكون دكتوره متميزه .ز مش معقده فرحت لما لاقيت الدكاتره عندنا فى القسم طيبين جدا فيما عدا اتنيين منهم جواهم طيب بس بيحاولوا يبينوا العكس بس المواقف بتبينهم .. بجد رغم كل اللحظات اللى بتمر عليا بين الحين والأخر إنى مش عاوزه دكتوراه ويادوب اخد الليسانس وكفايه لأن نظام التعليم فاشل إلا إنى كنت عارفه إنها مجرد لحظات وأرجع أصمم انى اكمل تحقيقا لرغبة والدى اولا ولرغبتى ثانيا .. بس فعلاً حالياً ورغم محاولات والدى المستميته والتى لازالت غنى أحاول اذاكر ولكن كله دون جدوى وكالعاده يصل والدى لنتيجه واحده وهى ان هناك يد مجهوله دمرت عقلى وتفكيري !!!! مش عارفه ليه وفين اصلا الايد دى وأنا اقطعها

هو الموضوع مش أكتر من تراكمات .. مدايقه إنى كل شويه أكتشف إنى لعبه .. كل شويه الناس تخلينى اتمسك بأحلام وفى الاخر افوق انها مجرد أحلام .. شئ خنيق جداا.. ليه منا لبدايه من اول سنه ما قالوش ان نهايتها سودا؟ ليه من اول سنه استقبلونا بالورود والمستقبل الباهر والعقل اللى حيكبر والقدرات الخارقه عن العاده اللى حنكتسبها؟
شئ خنيق وانا أتذكر كل دكتور وهى يُمتع الدفعه كلها بالشحنات الموجبه نحو القيم واللى كنت أصلا مستغنيه عن الشحنات دى لأنى بحب المجال ده وكنت بتمنى اكتسب معلومات جديدهمنه ولكن ....سريعاً تم تبديل الشحنات الموجبه بشحنات سالبه فى وقت لاينفع فيه الندم فى الليسانس!! او بمعنى ادق منذ التيرم التانى لسنه تالته ولكنى كنت بلاقى شئ لا إرادى جوايا لا يردد سوى كلمه واحده وهى ولـــــــو بمعنى إن مهما قولتوا من سلبيات حكون دكتوره وإن كان لينا عُمر حيكون بينا منافسه شريفه ..
لكن الظاهر إن ما تلقيته كانكافى إنه يخلي نظرتى سلبيه بشكل إجمالى.. ياريتى ما كنت بروح مكتب دكتور وكنت إكتفيت بالشحنات السالبه اللى بتلقاها بين الحين والاخر فى المدرج..
فعلاُ مش عارفه حصلى إيه .. بجد ماكونتش كدا..
حالياً حاسه إنى مش حقدر أعيش مُجملاً فى ا لجو ده .. مش دى حياتى اللى ذاكرت علشانها قبل كدا ولا عاوزه أذاكر لمجرد إنى أنجح واجيب شهاده متعلقه .. مدايقه من نفسى إنى بالضعف ده

أيـــــــام .. يارا

no title

مش عارفه بجد انا حطيت الصوره لوحدها ليه

بس أنا شايفاها مش محتاجه اى تعليق أو كلام ممكن يقلل كتير من المعانى اللى فى الصوره
ويمكن يكون ليها معانى أكتر من اللى انا شيفاها

فيه حاجات بتكون أحلى من غير تحليل

دِستور ولا دَستور ..؟؟

مواضيع كتيره فى دماغى عاوزه أكتبها وبيمنعنى عنها إحساسى أو شبه يقين إن ماعنديش معلومات كافيه عنها .. ولكن بما إن موضوع الساعه " والله أعلم هى ساعه ولا أيام ولا شهر ولا شهور لحد ماييجى غيره " وهو موضوع التعديلات الدستوريه

من اللى سمعته اتخنقت من السلبيه اللى لازلنا فيها مش بنتجاوز حد الكلام .. وبنتعب من شوية ايجابيه صغيرين ونتراجع عنهم بسرعه

المهم بدأ الموضوع لما سمعت صدفه عالجزيره وبعدين طنشت وبعدها بكام يوم وانا مروحه من الكليه لاقيت واحد متحنط جنب البوابه وماسك ورقه كبيره ومكتوب عليها

" بحبك يا مصر وبوفى .. وعالتعديلات أنا حقضى .. لا للتعديلات الدستوريه "

بصراحه أنا إتريقت على اللى مكتوب وعلى التصرف الفردى ده .. وتوالت بعد كدا على سمعى أخبار التعديلات ورفض الإخوان والمعارضه وإنسحابهم فى التمرير وتقديم موعد الإستفتاء ليوم 26/3/2007

وياترى يا هل ترى الشعب حيقاطع الإستفتاء ولا حيروح ويختار " لأ"؟

بدأ الموضوع يشغلنى - وحتعرفوا هو ماشغلنيش من البدايه ليه فى الاخر - الصبر حلو

قولت أسأل والدى - مصدر الثقه الوحيد مقاروة بالجرائد الحكوميه او المعارضه او السودا او الصفرا او البيضا او البمبى المسخسخ حتى لكن اللى حصل إنى ما سألتوش !!

وفجأه لاقيت ناريمان صحبتى بتتكلم عن التعديلات مع انى عارفه ان مالهاش فى السياسه !! داخلياً قولت تمام أهى واحده تفهمنى بالبطئ .. لكن طلعت معلوماتها كربون زيي

سألت ناس كتير - وأيقنت إن السؤال لغير الله مذله - ولا حظت حاجات كدا حقولها تحت بس الأول

دى المواقع علشان اللى عاوز يفهم الموضوع إيه ومش عاوز يكون زى الأطرش فى الزفه - الأطرش والزفه معانا فى باقى الكلام بردوا - المهم اهى المواقع

تص الدستور

التعديلات المقترحه

الإخوان المسلمين

نرجع بقى للى لاحظته ...

لاحظت غن فيه ناس مايعرفوش عن التعديلات أصلاً !!؟

وناس سمعت وطنشت ;)

واللى سمع إنها وحشه وخلاص

واللى ولا سمع ولا فاهم هما معترضين على إيه اساساً ولا إيه معنى دستور أصلاً ولا عاوز يعرف لأن الاخوان بيجوا عالتافهه ويتصدروا وكلمة لأ مزاااج عندهم !!!!!!!!!!!!!!!!!!!!!!!!!!!!!!!!!!!!!!!!!!!!!!!!؟

إحقاقاً للحق كلهم عندهم حق .. أنا وصلت للكليه وماسمعتش كلمة دِستور - بكسر الدال - ولا عرفت إن فيه حاجه إسمها دستور غير من فيلم عايز حقى بتاع هانى رمزى .. قبل كده كنت فقط بحسب الكلمه دى مجرد تهريج لما بقولها بفتح الدال !! .. ومن فتره مش طويله ولا قصيره بقيت بقولها إسبوعياً طلباً لجريدة الدِستور اللى بردوا ماقالتش يعنى ايه دستور ولا فكرت تخصص جزء من صفحه حتى تشرح فيه فى كل عدد ماده من مواد الدستور اللى مسميين الجريده على إسمه... وسبحان الله الاتنيين إتعدلوا سوا يعنى قالوا نعدل الدستور قامت الجريده إتعدلت بردوا وبقت بعد ما كانت بتصدر كل يوم أربعاء فقط بقيت كل يوم !! ومن وقتها ومش بقيت أقراها !!! هل من علاقه بين يومية الجريده وإسبوعيتها وبين تعديل الدستور المصرى !!؟

ماعلينا.. أصلاً إزاى نوصل للجامعه وخلاص حنتخرج وطووووووووووول فترة التعليم دى مادرسناش الدستور ولا حتى سمعنا عنه غير من هانى رمزى فى الفيلم .. الله يكرمه بقى !! عرفنا ان البلد بتتحكم بدستور

.. يعنى عاوزين يدرسوا الجنس فى المدارس ويعملولوا ماده ومافكروش يدرسوا الدستور ويعملولوا ماده ولا حتى حصه !! وعاوزين إنتماء !! طب منين؟

طيب أصلاً إزاى الناس تتفاعل مع التعديلات وهما أصلاً عندهم جهل بعدد مواد الدستور أو بمحتواه أصلاً

أحياناً بقول ماكان مبارك ده جاب الدستور وعدلوا من سُكات وماوجعش دماغه ودماغنا لسببين

أولهم .. إن 10% يعرفوا مواد الدستور وهم دارسى القانون وبعض المهتمين ... إنما دلوقتى الموضوع كبر ويمكن هو ده الفايده من التعديل ان الناس بدات تسال يعنى ايه دستور وتعديلات .. بس ياريت مش كل من هب ودب يتكلم ويعمل نفسه فقيه دستورى قديم

تانيهم بقى .. إن إحنا نجيبها كدا

نجيبها كدا

هى كدا

يعنى موافيين ولا رافضيين ولا قولنا لأ أو أه اللى عاوزه حيعملوا .. ماهى عزبة الحج واللى حيستخدم المخ الصعيدى يسلملى على المعتقل

-ده لو فعلاً العدف من الدستور تعديلوا فعلاً وإن يكون هو فعلاً عاوزه يتعد ماهو فىالسياسه مافيش خط مستقيم - ولا إيه ؟

رأيي ... أكيد رافضه لكن أشك إن إرادة الشعب شغاله لسه اصل مجلس الشعب وافق ماعدا المعارضه وبعدين إحنا نقول لأ ونغنى لأ ونصرخ ب لأ واللى بيحصل عكس لأ !!! ولا إيه؟

يعنى الحج مبارك " ماهو أكيد حج يعنى " بتعامل معانا على إننا شوية كلاب " وهو الكلب ملا يهوهو ولا يلألأ حد بيرد عليه "؟

أصل دم فاسد وساكتين

أنفلونزا طيور وساكتين

فساد إدارى ولا حكومى وساكتين

تلوث ميه وهوا وساكتين

أغذيه شكلاً أكل ضمناً كيماويات وساكتين

بطاله وساكتين

تعليم فاشل وساكتين

أمراض وأوبئه وأطفال بتموت وساكتين

قاعد فوق الربع قرن وساكتين وبنقولوا متعودين عليه ومسيره يشبع

وغيره وغيره وغيره

حقاً.. قولنا لأ بس النتيجه؟؟؟ بقينا زيهم " زي مين ؟" ماهما إحنا أصلاً ولا إيه؟

هو الريس طبيعى عارف إننا حنقول لأ بس هو عاوز النتيجه

بس هو علشان الدوشه ماتزيدش وتبقى بإمكانيات فتح معتقلات واعتقل أغلب الاخوان وعلشان مايلاقيش حد يقولوا بم قال اعدل الدستور واخلىكل حاجه فى إيد الحكومه أصل الشعب ده نونو لسه ومش بيفهم ماهو التعليم بوظهم ومش فاهمين ان التعليم المصرى مايخرجش غير حمار بدرجة امتياز لكن عيالوا يا سلام عليهم يا جماعه مالوا جمال ماهو اكيد تعليمه بره مصر مابوظش عقله زى ما عقولنا باظن

ماعلينا بقى من الأخر كدا نخبط إحنا راسنا فى الحيط

ونرفع ما أردنا من شعارات وعبارات رنانه

بس يااااااااااااااارب يكون بنتيجه

وإن كنت اشك .. أصل الشعارات ماهى إلا شعارات

ملحوظه كدا على جنب وإن كانت ولا حتزود ولا تقلل إنا موافقه على فكرة مقاطعة الاستفتاء تماما بس زى ماقولت بلاش موضوع فردى ده

قال تعالى : " وإعتصموا بحبل الله جميعاً ولا تفرقوا "

" إن الله لا يغير ما بقوم حتى يغيروا ما بأنفسهم "

ياااااااااااااريت الايتين دول يتجاوزوا حد القراءه

لا شـئ يـهم

عُدت بعد طول غياب يدفعني الشوق لفضائي ولكم
حديث طويل عن الذكريات والأحلام والأمنيات .. ولكن عجباً
تهرب الأحرف في اللحظات الأخيرة
وكأنها تبحث عن الأمان خلف هذه الجدران في الأعماق

لا شيء يهــم ..
في بعض الأحيــان .. أترك نفسي لأحزانهــا

وآلامهــا

وجنونهــا !!

أغمض عينايّ بشــدة .. وأردد (( ليذهب كل شيء للجحيــم )) !!

لا أريــد أن أقــاوم

لا أريــد أن أحــارب

لا أريــد أن أثبت ذاتـي

ولا أحافظ على كياني

ليذهــب كل شيء للجحــيم .. ليحتــرق العالم ... !!!
سأترك نفســي لهــذه العــاصفة التي تعربد في أعماقي
فلتأخذنــي في طريقــها .. لترفعني إلى عنان السماء
ولتهبــط بي إلى أقصى نقطــة في قـاع الأرض

لا يهـــــم .. !!

وبعد هذه الرحلة الشاقة المُبكية المضحكــة فى نفس ذات الوقت

هل سأجد ما أبحث عنه ؟؟ !!
هل سأصل ؟؟ !!
لا يهــــمّ .. !!!





عذراً أيها العابر الكريم فهي مجرد
بعثــــرة

يا حالولى عالتفاهه

ها.. الأول بصيتوا فى الصوره؟
الإنطباع اللى عندكم إيه؟.
الأطفال دول لمحتوا أشكال تماثلهم قبل كدا كام مره؟
هل حضرتك كنت فى طفولتك بالشكل ده؟
هل والدتك كانت ممكن تسيبك كدا؟

عِلماً بأن الأطفال دول مش أطفال شوارع كما ظن البعض من أصدقائى اللى شافوا الصوره كامله وكانت محسوبتكم موجوده فيها وكإن فيه وجه شبه ما بينى وبينهم!!..
كمية تعليقات بمنتهى السخافه عن الأطفال!! وحتى من كانوا معى فى السفر ده كانوا مستغربين ازاى انا قاعده معاهم وسايبه كل حاجه!! .. كانوا بيتعاملوا بقمة الاستحقار مع الأطفال دى!! طبعاً ماهو الأطفال دى ساقطه من حسابات كل الناس وبقصد او من غير قصد بتخاف يلمسوك ولو لمسوك بتسمح مكان اللمسه اه ماهما مش من نفس المستوى!! او الطبقه الأدميه بتاعت جنابك!! الغريب ان اللى بيعمل التصرف ده فاكر ان الاطفال دى مش فاهمه ولا حاسه !! ولا ده بيأثر على نفسيتهم سلباً لمجرد انك تبان مُهندم قدام صحابك او تحافظ على مظهرك الخارجى لازم تتعامل كدا معاهم وغالبا ما بيكون اسلوب الشتيمه ومد اليد هو المُتعارف عليه معاهم لازم تستحقرهم وتبعد عنهم وتتجنبهم علشان تترحم من تريقة أصحابك على انك قاعد مع -الأشكال دى- على حد تعبيرهم

أغلبية مُدعى الإصلاح ومحاربة الفساد ناسيين انهم ممكن هما فى حد ذاتهم مصدر فساد!!
اللى عملوا حملات إنتخابيه علشان يدخلوا البرلمان ما إفتكروش العيال دى؟ ما فكروش انهم نتاج مجتمع فاشل .. وبيت تايه..مش حقول بيت مُفكك لأن الأهل سوا وبيقعدوا سوا لكن الاحساس بالطفل ده وطفولته مش موجود!! الاطفال دول شقيانه.. بيشتغلوا فى الصيف وفى الدراسه
نسيب الشكل على جنب وحنقول السبب فى بهدلة الأطفال دى لأنهم أطفال وبيبهدلوا نفسيهم وبيقطعوا جذمهم ودول راجعيين من المدرسه تعبانيين ومبهدليين كدا

مستحيييييييل أى أم وأب يكون بإيدهم إنهم يخلوا عيالهم فى احسن مظهر ويقصروا .. مستحيل أم فى الشتا ده تنزل إبنها بجزمه صيفيه مليئه بشبابيك التهويه فى الشتا ده بمزاجها!! مش قصر يد وضيق حال وغلو أسعار وإن اللى جى أقل بكتييييييير من اللى المفروض يكفى بنى ادم.. ومايكونش السبب فى ناس بتهتم بالتفاهه اكتر من اى حاجه .. بتهتم ان إحتفاليات معينه تظهر فى أفضل مظهر وطظ كبيره لأى حاجه وللناس الجعانه.. ولأن مجتمعنا واحنا بصفه عامه - زى ما بنعرف نقول الحكومه عملت ياريت يكون لينا كم كافى من الشجاعه بمواجهة اننا احنا السبب وإحنا كمان عملنا -درجة الإهتمام بتوافه الأمور أد إيه؟ هاله سرحان عملت .. هاله سرحان زورت ونيلت وكإننا فى مدبحه وهوووب العجل وقع هاتوا السكينه.. نهتم بالمغنيه فلانه لابسه فستان واو ولا الميك اب خراااااافه إزاى نقلدها طيب ياترى انهو ماركه وانهو درجه الميك أب ده ننتقد وجود عيد الحب وبنحتفل بيه وبنلاقى مخارج تحلل الاحتفال بيه... شعب شطور أوى فى إنه ينتقد الحاجه ويعملها فى نفس ذات الوقت !!

نرجع لموضوعنا و ندخل جواهم.. وملخص اللى وصلتلوا بعد ما قعدت معاهم يوم كامل بقيت انا وهما واحد بس سؤال بسيط كدا..
كام شاب وصل لل 21 وما فوق وبيدلع ومش شغال ومتسكع فى الشوارع وعلى النت او واحد فاكر نفسه سياسى فذ من نوعه وقاعد ينتقد فى أحوال البلد وهو مصيبه جابتها البلد ومصمم يشتغل بشهادته ولا أقل من ذلك!!ماهو مش اى أى ولا زيه زي بقى يا خويا بلا خيبه بص أطفال بلادنا( على أساس اننا كلنا فى مصر) الاطفال دول شقيانه بمعنى الكلمه بيشتغلوا صيف شتا فى وقت دراسه مش دراسه بيشتغلوا واحد صياد والتانى محار ( حاجه كدا بتتعمل فى الشقه لما تتبيض) والتالت ميكانيكى والرابع صياد بردوا عجبونى وهما بيتكلموا بحماس عن شغلهم .. ولكن لا تغرك المظاهر.. الأطفال علشان يكونوا اطفال مزوغيين من المدرسه علشان يلعبوا سوا وعلشان ماذاكروش وعلشان مش عاجباهم الدراسه ولا النظام ..مش عاجباهم بلدهم وهما لسسسسسسسسسسسه أطفال فى 6 إبتدائى وواحد منهم أزهرى

حواربسيط مع مصطفى اللى هو الأخير ده
مصطفى و أحمد ( فى صوت واحد ) انا- كل واحد بيتكلم عن نفسه- نفسى أهج من هنا وأسافر والله تاخدنيشى معاكى؟
أنا .. " إندهاش او عته هو كان منظرى غريب وخلاص" ايه الكلام ده انتوا لسه صغيرين وبلدكوا جميله اوى انا لو بإيدى أفضل هنا على طول
مصطفى .. " بيشاورلى بإيده كدا زى ماتقولوا كدا بيقولى اجرى إلعبى بعيد انتى عبيطه" انتى ماتعرفيش حاجه تعالى اوديكى على النيل قدام اوريكى الزباله إكوام تشوفى النيل بالعافيه ..انتى عارفه الفلل ( هو شايف انها جمع فيلا)دى ملك واحد إسمه ............ ده شارى البلد كلها
يقاطعه أحمد.. شارى البلد ايه انت شكلك مش عارف حاجه بصى يا استاذه هو شارى فلل -نفس الجمع-بس هو قاعد فى مصر وهو يقعد هنا يعمل ايه ماهو على قلبه أد كده ماتخدينى معاكى

مصطفى .. اتنيل ماهو زيه زينا من بلدنا جيشى انت تبص فى مصر الريس بتاعها بيبيعها للخواجات ببلاش إلا هو مش حيتغير يا ابله؟
أنا ( محاوله بائسه لتجميل الوضع وإزالة معالم العته اللى اترسمت عليا)لا حيشيلوه خلاص بس إنت قول يارب مايجيش ابنه مكانه بس سيبك من الموضوع ده بس علشان ده اكبر من سنك وعلشان بيجيلى إكتئاب من السياسه.. تعرف انا فى بلدى يا مصطفى بتمنى اشوف النيل ونفسى اقعد فى بلدكم دى طول عمرى إدعيلى اتجوز من عندكم
مصطفى ( عامل فيها الواد الشيك) ألف من يتمناكى يا ابله بس تسيبى اسكندريه وتيجى هنا !!؟
أنا .. ( فى عقلى بقول انت عبيط ياد برسم ابتسامه) الله يخليك يا مصطفى بس قولى انت ليه شغال من دلوقتى
مصطفى .. وهو ابويا حيجيب منيين انا بس اقعد كام يوم ما اروحش الشغل ما الاقيش اكل ولازم أساعد ابويا وهو كبير
أنا.. طيب وانت مرتاح فى شغلك والريس بيعاملك حلو؟
أحمد.. احنا بنأخد ضرررررررررررررررررررب

بس كفايا كدا أصل بصراحه الكلام مش حيخلص
بصراحه الاطفال دول غيروا مفاهيم معينه جوايا وفى نفس الوقت أحمد فى نص الكلام لماواحده إتريقت على انى مقضيه يومى معاهم ورافضه اروح مكان تانى قالها يمكن تصلحنا قالتله هى اللى حتصلح الكون ده وضع طبيعى ناس حلوه وناس وحشه ناس عايشه وناس مش عايشه وكل واحد لازم يرضى بحاله
قالها ابويا قالى كلمه اتولدت راجل مايخدعكش صغر سنك عيش راجل وانحت فى الصخر وغير شكلوا.. يعنى انا بجد عجبنى رد فعل الولد ورغم انه لسه نونو فى نظرى إلا انه بجد عقلية شخص اكبر من سنه بالذات لما قالى لو ألاقى حاجه اعيش لها كنتزمانى مش بشرب شيشه
أه بيشربوا شيشه فيه ايه ماحدش يساغرب ما احمد أهو فوق ماسكها هى مش شيشه بشكلها المعروف هى شئ أسوأ هى صناعه يدويه - ياسلام على العيال لما تفكر!!-هى برطمان إزاز متغطيه بفِل كدا وفيه دايرتين واحده فيها العصايه دى والتانيه فيها دايره جديد بيحطوا فيها -تبغ السيجاره او اى حاجه بتتشرب بقى وفى البرطمان ميه ابقوا جربوها بقى

تفكير بديهى العيال دى صايعه .. وهنا حنختلف لأنهم معدنهم كويس وده اللى بعامل بيه الناس وكان طبيعى أسألهم بتشربوها ليه وكانت الاجابه علشان ننسى القرف اللى احنا فيه!!! العيال دى عندها قرف؟!! -محدش يجيلوا الضغط ده قرفهم مش تبع سنهم خالص

قرفهم كالاتى .. قرف سياسة البلد.. قرف قصر اليد.. قصر التعليم وعدم قدرتهم عالمذاكره .. قرف إن الاقصى محتل وهما مش بيعملوا حاجه.. قرف إنهم نفسهم يكبروا بسرعه ويريحوا ابوهم

معااااكم ان ده تفكير غلط وسلبى انهم ينسوا القرف ومايحاولوش يحلوه ويخلوا القرف اللى قارفهم مايكونش موجود ولكن ده اللى بيشوفوه فى التليفزيون .. الشاب من دول يتخنق يجري يشرب حشيش وسجاير ويصيع بقى.. فبالطبع ده الحل المثالى مع انهم رغما نهم اطفال عارفين ان مش ده الحل وعلشان كدا قعدوا معايا وذاكرنا سوا واستفادت ملومات ما اعرفهاش فعلا!!وحفظنا كل حاجه كانوا مش حافظينها بمعنى ان مخهم نظيف فعلا وقدرتهم على الاستيعاب قويه ..

انا اكيد مش بتكلم عن احمد واحمد واحمد ومصطفى انا بتكلم عن حاجه عامه وحكيت كلامهم فى النص

طيب ايه يوصل العيال دى ل كدا .. ليه مايبقوش أطفال عقلهم ماشى مع سنهم .. ليه العيال دى شايله الهم ده والاكتر منه .. ليه فى عيونهم كلمة ليه؟ وأسئله عن وجودهم فى واقع رافضينه

معلش يا شعب من قلبى بقول انكوا شعب مقضيهيها.. نفسى ثم نفسى ثم نفسى ومش حقول يا حكومه أصل الحكومه ماهى الا ششعب والبلد ماهى الا شوية ناس سوا واحنا شوية الناس اللى خاربين البلد.. لو الرئيس خاربها عالمستوى الدولى فإحنا خاربينها على المستوى المحلى ..

بلاش نجرى ورا التفاهات ونسيب الأساسيات

بلاش نقول لا مش موافقين ومسافة ما ظباط البوليس يحمروالنا عيونهم تتحول ال لأ ل أأأأأأأأأأأأأأأأأأأأأأأأأأأأأه موافقه

بلاش نعيش عاطلين كدا .. نتمطع على الكرسى قداما لكمبيوتر وجنبينا شماعهكل حاجه وحشه نقول اصلوا رئيس بلد واطى اصلو زباله ..

بذمممممممتك كام مره روحت دار أيتام ولا دار مسنيين ؟؟ - بلاش تجاوب بذمتك المغشوشه انا عاوزه الشفافيها للى جواك تجاوب-

طيب كام مره طفل زي ده هزر معاك وضربته او بصلك بإبتسامه او بصلك عادى وإنت ولا إهتميت؟

انا ماقلبتش على جمعية رساله ولا غيرها من الجمعيات اللى عمرى ما إنتميت ليهم ولكن قبل ما بحماسه شديده نرفع ايدينا ونشاور على الرئيس والحكومه ونقول هما السبب نشاور على نفسينا الاول ونشوف إحنا ايه أصلا ؟ وعملنا إيه اساسا للبلد دى؟ ولا ناويين نعمل ايه؟

خطوه ايجابيه مش مظاهره ساذجه ولا كلام فى الهوا طاير من شخص حائر فى موضوع الدستور اللى بيتعدل ... نحو المدارس اللى حالتها أسوأ ما يكون .. فقراء الناس اللى مش بنحس بيهم.. دار الايتام الخاليه من الزوار الا فى يوم اليتيم كإن الناس كان عندهازهايمر كلها ومره واحده إستعادوا الذاكره!! .. خطوه إيجابيه توقف ظاهرة انتشار الشحاذين فى الشوارع لدرجه تخليك تظن ان الشحاذين استولوا عالبلد..- بلاش نرجع نقول يا حكومه - او أقل تقدير فكره فى نفسك بإيجابيه اكتر وإزاى تتغلب على حاجات كسرتك وحطمتك وتثبت لنفسك إنك مش ضعيف بالشكل ده

بلاش نعمل شبه الجزارين وهما بيتفننوا فى كيفية دبح العجل وعايشين حياتهم جوه المدبح وناسييييين ان فيه حاجات اهم من التفنن فى دبح العجل لانه مش محتاج فن

البوست طويل انا عارفه .. وبعتذر

التــــــــــــاج

التاج ده وجهتهولى ريكا الركروكه وانا مؤخرا قررت أجاوب عليه .. يمكن بيحتوى على القليل من الفضايح ... ماعلينا بسم الله أبدأ وإقروا بقى
_________________________________________
ماذا سيحدث لايميلك بعد موتك؟
إحم.. مافكرتش فى الموضوع ده قبل كدا .. بس أكيد مش حيحصلوا حاجه حيتقفل ويمكن ولاد الحلال يدخلوا يقولوا انى موت وتقروا عليا الفاتحه وتدعولى .. وياريت لو بداتوا الدعوات من دلوقتى

هل اعطيت كلمة المرور او كلمة السر لاحد من قبل؟
أها عطيتها لاتنيين من صحابى هما سميه ونهى .. و حبيبى كمان يعرفها اعتقد .. وأختى الصغيره امانى كمان

اذا كانت الاجابه نعم ،فما كانت طبيعة علاقتك به ؟
يااااااااااااه على الاسئله المكرره واللى هدفها هو إنها توجع الايد وبس ما قولت فوق اتنيين صحابى وواحد حبيبي واختى الصغيره والعلاقات طيبه والحمد لله

اسم الدلع المعروفة به بين اصحابي؟
المشهور هو شيمو .. وبابا حبيبى مش بيقولى غير يا مشمش .. امى بتدلعنى وقت الحاجه يعنى مصلحه ;) وبين أصحابى العام إسمى لسه موجود فى أرض الواقع ما إتلغاش.. وفى فتره كنت قربت أنسى إسمى لأنى كنت مرتبطه بالنت اكتر من كدا بمراحل وكنت بحب جو المنتديات وكان إسمى فى كل المنتديات كبرياء يعنى اى كبرياء او كبرياء فى دموع أو كبرياء أنثى يبقى أنا :) وكنت بفكر انى اغير اسم شيماء ل كبرياء !! ولكنها مرحله وراحت لحالها دلوتى إسمى عجبنى جدا

وإنجى صحبتى مسميانى tea water
وأصبح ده الاسم المتداول بالنسبالها هى واخواتها ومش بيقولولى غيره تقريبا

وفيه إسم خاص ب واحد بس وهو صديق وأخ على النت إسموا إبراهيم كنا انا وهو وأصحابى نهى وسميه عاملين سوا حزب كدا ومسميينه الكتكوت المبلول كنا عاملين الحزب ده لمحاربة الظلم وأفكار أفلام الكرتون دى لأننا كنا مضطهدين فى المنتدى فكنا مسمين الناس اللى بتكرهنا اسم الفك المفترس واحنا الكتكوت المبلول وبالنهايه كنا إحنا اللى بنفوز وكان لكل واحد مننا إسم وتقريبا هو نسى إسمى الحقيقى أصلا..
أنا كان إسمى ..... البورص (ممنوع التعليق على الاسم ) بورص عن بورص بيفرق;) طبعا
إبراهيم كان إسموا .... تطور
سميه كانت إسمها .... ناضورجى
نهى كان إسمها .... سينس
وكل إسم بيعبر عن صاحبه

يالهوى على ا لفضايح كفايا كدا

عمري ؟
بيقولوا انه 20 سنه وكام شهر وفى يوم 22/7 حكمل 21 والهدايا مقبوله أكيد:)


شغلي ومجالي؟
انا مش بشتغل إلى الان لسه بدرس :( نونو يعنى لسه ..مجالى هو علم النفس
يعنى إن شاء الله كلكم زباين عندى ... وطبعا مش ناسيه ان ريكا العلاج مجانى ;) فى حالة انى لوكملت دراسه ان شاء الله

نوع شخصيتي؟
والله السؤال ده جه فى وقت انا مش فاهمه فيه نوع شخصيتى !! يعنى أعتقد لو قبل كدا كان ممكن أقول إجابه منطقيه نوعاً ما لكن دلوقتى حقول اللى شيفاه واللى عنده كلام تانى يقولوا
عالوجه العام انا شايفه انى إلى الأن انسانه لازلت طبيعيهنوعا ما سهل جدا يجيلىى إكتئاب حاليا مع ان ده كان صعب زمان يمكن لأن نظرتى للأمور اتغيرت واخدت إطار عقلانى شويه ؟؟
عنيده جدا مش بتنازل عن شئ انا بحبه وعاوزاه بسهوله وممكن اتحمل اى حاجه علشان احقق إللى بتمناه
متناقضه أحيانا كتيره لدرجة انى بستغرب نفسى
حاليا لو انا غلطانه بعترف انى غلطانه زمان كان مستحيل ده يحصل
أحب أكون مصدر إهتمام لو حسيت ان اللى قدامى مش عاطينى الاهتمام دده بتتغير مشاعرى 360 درجه فجأه
أحب أضحك وأهرج وألعب واللى يدايقنى ان ده يتفهم غلط ويكون مصدر نقد يتوجه لى


السفر بالنسبة لي؟
بحب السفر جدا جدا ولو سمعت سيرة سفر ببقى حموت وأسافر مؤخرا أصبح السفر شئ مكروه بالنسبالى وبالذات لأن كل السفر جوه مصر ولأنى حاسه انى بقيت بميل أكتر للاستقرار وقعدة البيت .. شكلى عجزت ولا إيه

المود بتاعي؟
بصراحه مش قادره احدد المود بتاعى حاليا .. هو خليط من زهق على شوق على زعل على ضيق على غضب على حيره على إحتياج .. بجد مش عارفه أحدد

وقت فراغك وكيف تقضيه؟
وقت فراغى .. إحم مؤخرا بقيت بنام بس بما إنى بحاول اغير العاده الجديده دى فرجعت أقرا اى حاجه ألاقيها فى المكتبه او اى جرناال او جريدة الدستور او اقرا المدونات او اكتب خاطره ... الغريب ان ساعات بقعد افكر فى وقت فراغى مع انى مقتنعه ان مخى وظيفته فى التفكير انتهت

الاكلة المفضلة؟
تقدرى تقولى كل الاكل متساو عندى يعنى مش بحب اكله واكله لا انا أقدر اقولك الاكل اللى بكرهوا كل البقوليات كل الطبيخ والمسبك كل الألبان بلا إستثناء ... فيما عدا كدا بأكل والأكل بيكون مفضل بصوره وقتيه

الصفات اللي اخدتها من ماما و بابا ؟
شكلا فيا كتييييييييير جدا من بابا حبيبى ربنا يخليهولى بس بيقولوا وانا صغيره كنت شبه امى جدا بس شكلىبتحول لولد وانا مش حاسه :) .. أخدت من بابا حاجات كتييييييييير جدا تقريبا لأننا مشتركين انا وهو فى نفس الشهر ؟ بس دايما امى تقولى إنى توأم بابا وده مش بيدايقنى عالعكس تماما وبابا أصلا قمر و عقله وتفكيره بيعجبونى جدا ومناقشاته بنتظرها دايما ومنه بتعلم كتير جدا جدا .. بس اللى بتمنى أتعلمه فعلا هو الصبرررررر صفه نقصانى تماما بتمنى اتعلمها من بابا وماما
مممممممممممم أمى مواصفاتها صعب أتحلى بيها .. نادره فى صبرها وتحملها وعطاءها وكغنها بئر يرتشف منه كل من يحيط بها


اكتر ست حاجات بحبها؟

ممممممممممممممم بحب أحس إنى مرتاحه الاحساس ده عندى بالدنيا

احب أحس ان اللى حواليا بيحبونى من قلوبهم فعلا ومجرد الشك فى كدا بيخلينى ادايق

ممممممم أحب اتمشى على الكورنيش جدااااا لانه مليان بذكريات جميله

بحب اتخيل جدتى وهى بتضحك يااااااااه التخيل ده كفيل يخرجنى من اسوأ حاله نفسيه

بحب نفسى وأنا بذاكر وحاسه انى بفهم ولسه مخى موجود وان الدراسه مش حفظ وبس ولكنها فهم ويمكن ده اللى مصبرنى على الكليه .ههههههه وبحبنى وانا حاسه انى بفهم الاحصاء وقادره احل فيها وأجاوب أصل الرياضه بصفه عامه دايما بنسى قوانينها ودايما مضيعانى

ممممممم بحب بابا وأخويا الكبير جدااا والدنيا كلها تضحك فى وشى وهما مبسوطين وفرحانيين وبحب الخروج معاهم جدا وبيكون له طعم تانى مختلف

اكتر 6 حاجات بكرهها؟

اكره ان حد يخلف وعده معايا ولو حصلت مره بفضل شيلاها طول عمرى مش سواد قلب لكن ... مش عارفه بصراحه بس الموقف ده بكرهه بشكل بشع وبالذات لو كان من ذكر بحس ان معالم الرجوله اختفت منه لمجرد انه خلف وعد .. للرجوله معنى خاص بالنسبالى

بكره النفاق جدا

بكره ألبس الطرحه وما تظبطش من اول مره .. أكره نفسى لما أخس لأنى مش ناقصه

مممممممم محافظ اسكندريه الحالى مش طيقاه وهو عمال يخرب البلد كدا

بكره ممممممممم ان يكون ليا هدف وما أفشل فى انى احققه واخليه واقع ملموس بحس بالعجز وأكتئب مده طويله

بكره أشوف ست عجوزه او راجل عجوز بيتسول او تعبان او شايل حاجات كتير او مدايق اوبيبكى يااااااااااااااه ده كفيل انى ابقى حموت من كتر ما انامخنوقه من المنظر ومش قادره اعمل حاجه

ممممممممممممم بس خلاص كدا سته

الشغل بالنسبة لي؟

زى ما انا قولت قبل كدا امة الله لسه بتدرس وبصراحه انا بحب الشغل جدا وكان نفسى اخلص كليه وأشتغل بس حاليا ... ممممم حاسه انى مابقاش عندى الرغبه فى كدا بس عاوزه اكمل دراسه على امل لما اشتغل ما اتبهدلش .. بس افتكر بقيت اميل اكتر للحياه الهاديه ..والشغل مش بيوفر حياه هاديه خالص

الكمبيوتر والنت؟

مهميين جدا بالنسبالى.. أصبحت مرتبطه بيهم بشكل او بأخر ومش بقدر يفوت يوم ما ادخلش ولو حتى أبص وامشى .ز ووقت الامتحانات او لما بكون مش فى البيت لأيام بيمر كإنه سنيين وأول ما اوصل البيت ايدى على الكمبيوتر

من سترسل لهم التاج؟

ح بعته ل ناريمان صديقتى

narytom

أى طلبات أخرى يا ريكا ;)

بــــــــــــــــــــراح .... لـلـفــضــفـــضــه

مين بيحس بيك .. مين تكلمه

مين دمعة عينيك .. ممكن تألمه

ما إنت عايش لوحدك مع إنك وسط ناس

عايشيين مع بعض لكن عايشيين كدا وخلاص

خايف مايحسنيش.........................

خايف أعيش حياتى علشان لازم أعيش

حتى إللى فاكرها روحى وهى كل الحياه .. سابتنى أقول لروحى تعبت من الحياه

أولاً الكلمات إللى فاتت دى دويتو بين عمرو دياب وجورج وسوف !!! سمعتها بالصدفه على موبيل عزيزه( بنت خالى) ... ماعلينا بقى شوية كأبه وجايز هنوصل لشوية تهريج ... ليه لأ !!؟

بصراحه الكلمات شدتنى جداُ رغم إن مكان النقط فيه كلام بيقولوا جورج ودانى مميزتوش!! بس حسيت إن الكلمات القليله دى حددت اغلب أو كل الأسئله إللى جوايا بشكل عام وجوه أى حد بشكل عام بردوا

أنا أصلا يوم ماعملت البلوج دى مافكرتش انها تكون موضع اهتمام او معرفه من اى حد لأنى أنا كنت عاملاها كفضفضه مع نفسى .. أحكى فيها وكإنى بكلم ناس كتير أو كإنى بكلم شخص بعينه أو بكلم نفسى ..!!! ليه لأ ؟ كنت عاوزه اقول أسامى وأحكى ذكريات بوضوح

كنت عاوزه ابطل موضوع انى أقول اللى مزعلنى على ورق بإمكانى أقراه كل وقت وفى أى وقت كنت عاوزه اكتبها بعيد عن متناول ايدى علشان مش كل شويه أقرا اللى مدايقنى وإن بالصدفه وأنا بلعب فى الأجنده او بدور على ذكرى كويسه .. وبعدين قولت وليه ما أخدش بنصيحة من نصحنى فى الماضى بإنى أتكلم مع كائنات حيه بشر يعنى بدل الجماد .. ومن هنا عطيت لأصحابى عنوان البلوج .. منهم إللى اهتم ودخل ومنها من تناولها كعابر ومنهم من لم يلقي لها إهتمام .!! ولكنى ما أنكرش إن فيه ردود بتريحنى بشكل أو بأخر

المشكله تتلخص فى إيجاد شخصيه واحده تحقق كل اللى بالأحمر فوق ده .. تنزع الخوف .. احس إن الكلام لو له معنيين إللى قدامى حيفهم إللى عاوزه اقولوا من غير ما أوضح او أشرح

ممممممممممممممممم أقولكم حاجه مش قادره ما أقولهاش ... بس من غير زعل ولا لوم عليها ... أنا فعلاً حسيت مؤخراً أو بمعنى أدق إتأكد إحساسى إنى للأسف مالقتش صديقه صدوقه.. يوم ما أطلب منها نصيحه أخدها ثقه .. يوم ماتوعدنى توفى .. ما انكرش إن فيه صديقتين كنا المفروض كدا.. لكن .. لـــيتنا كــالأسماء لا يـغيرنا الزمن

مجرد تخيل بسيط كدا ع الماشى .... عايش طول حياتك سعيد بالفعل وحب الناس ليك مريحك نفسيا وحاسس بصدقهم وحاسس إن الدنيا يخيروغن اللى يقول غير كدا شخص حقودى وسوداوى جدا .. فجأه .. تلاقى المواقف والظروف بتكشف وشوش .. وشوش ل ناس المفترض إنك تعرفهم ولكن الوشوش بتختلف !! .. دايماً نقول محدش إختارأمه وأبوه .. طيب والناس إللى تم إختيارهم بإرادتك وإخترتهم بنفسك.. يعنى حتى قدرتك على الإختيار زفت وفاشله :) تفرح بنفسك وقتها !!؟

كنت قريت حاجه كدا عن الفشل والإكتئاب وأقدر ألخص كلوا فى المثل الشعبى القائل " إللى يشوف بلاوى الناس تهون عليه بلوته".... وبصراحه هى بتهون لكنها مش بتزول

المهم إنى كنت واحده من الناس إللى أكره إنى اكون ضعيفه أو اعترف بكدا ولا زلت كدا !!! رغم إللى بكتبوا ده بس يمكن لأنى كنت بقدر أتغلب على كل حاجه وادور على إللى يعوضها يعنى كانت جدتى (الله يرحمها ) وأصدقائى وشخصيه ما كان وجودى معاهم بيهون حاجات كتير جداً .. حالياً ... جدتى الله يرحمها :( .... الشخصيه ما ممنوع الحديث عنها أو النشر او التصوير !!! .. أصدقائى :( لم يعُد وجودهم فى حياتى بالأمر المُريح !!

كنت كمان مش بحب أفكرش كتير فى اى حاجه أو يمكن كان تفكيرى اعلى من دلوقتى !! يعنى اكون عكس الناس كل ما أكبر مستوايا العقلى بيقل!! وليه لأ كل شئ جايز والدليل إنى قررت انسحب وما أوجعش دماغى ب فلانه اتصرفت بإسلوب دايقنى او دى ماوفتش بكلامها او دى كدابه او دى او ده او او وقولت ألتزم بالحكمه القائله " إن لم تكن الوحده عباده .. فهى إلتعاد عن الشرور " ولكنى إحترت فى المقوله دى !! .. لأن الوحده ماطلعتش إبتعاد عن الشرور ولا حاجه دى طلعت مركز الشرر !! .. الكل يبدأ يلقى الإتهامات على الفرد إللى قرر يكون لوحده منعاً للمشاكل أو يبدأ مايدايقش من إللى يدايق ويكبر دماغه ويبدأوا يتهموك بإهمالك لحاجات.. والأصحاب بدل ما يكونوا جنبك بشكل فعلى بتحس إنهم مُجرد ديكور !!او بمعنى ادق إنت إللى ديكور فى حيااتهم.. وبدل ما يخرجوك من الخنقه دى بيزودوها !! هوووووووب بقى تلاقى نفسك فى منبع من الضغوط من البيت وبره البيت وأصحابك وبُعدك عن حبايبك وضغط جامعه وواجبات عليك تجاه ناس كتير وزيارات عائليه وغيره وغيره وتحاول تحل الضغوط دى كلها بإيدك وتقول محدش حيخاف عليا أكتر منى تلاقى كل ما تحاول تقف على رجليك حد يقوم موقعك .. وتحاول تقف تانى وتالت ورابع وهو بردوا يوقعك !! رخامه بقى .. بس بردوا تفضل تحاول وتحاول إنك تكون شئ والغريب إنى وسط الضغوط دى

لا أذكر سوى شخص واحد فقط .. شخص يظن أنه بالبعيد ولكنه قريب .. شخص تمكنت أنا من تحديد من معالمه ولكن معالمى لديه مشوهه .. طلبت مراراً وقف الإقتتال بيننا .. ولكن لا جدوى !!" ... ألا وهو .. الذكريات أو لنقل نفسى

إحم .. كان فيه كلام كدا إتبعتلى على الميل وأكتر اللى عجبنى الجزء ده
كم تضحك الدنيا وتبكي أسى

ونحن لا نبكي ولا نبسم

فلم يعد يضحكنا مضحك

و لم تعـد آلامنـا تؤلم

أضاعت الأفراح ألوانها

وفي عروق الحزن جف الدم

حبيت بس أحتفظ بيها وأختم بيها :)

Happy Valentine's Day !!!!

تعلمون ... أم لاتعلمون ؟؟؟

إن كنتم لا تعلمون .. فإقرأوا فتصبحون تعلمون

وإن كنتم تعلمون .. فإقرءوا لتتأكدوا هل حقاً تعلمون ؟

لقد سال شهريار شهرزاد عن الحب فأجابته بتلك الكلمات الوافيه كالأتى

عندما يأتى كالطيف فى عقلك فلا تسأل

عندما يأتى كالسيف فى قلبك فلا أمل

عندما تلقاه تسعد بهواه

عندما يلقاك تسبح فى سماه

وإذا مضى فلن تنساه

هكذا هو الحب سيدى .. لا يسير وفق الحدود .. ولا يعرف للمستحيل وجود

فلنتذكر ... كم صادفنا أحية على الطريق

كم تعلقت قلوبنا بحبهم

وكم تبسمنا للقياهم

وكم ذرفنا من الدموع لبُعدهم

فهل سينسينا الزمن الأحبه؟

أم ستحتويهم الذاكره بالمحبه؟

ونتذكرهم فى كل يوم يمر

والان نقول لهم يوم سعيد كباقى أيامكم إن شاء الله

رغم إننا نعلم جيداً أن عيد الحب هذا حرام وأنه ليس من أعيادنا نحن المسلمين ... وأن هذا العيد المزعوم يندرج ضمن إطار البدع إلا أن المجتمع أغلبه يختفل به والقنوات والإذاعه والشباب والفتيات كلهم يحتفلون به

... هم يتمسكون بالإحتفال به وأنا أتمسك بعدم الخروج فى ذلك اليوم :) عقدة من اولى كليه عندما علمت سر الحصبه الموجوده فى الكليه فى ذلك اليوم .. وكانت هذه المره الأولى التى سمعت فيها عن ذلك العيد المزعوم " بدائيه أنا عارفه"

أعلم جيداً أن الحب ليس درباُ من التفاهه لنُخصص له يوم نُخرج فيه مشاعر الألفه والمحبه لمن نحب " سواء أكان أخ/ اخت/صديق / صديقه / أب / أم/ معلم فاضل / رجل كبير ذو حكمه" فالحب ماهو سوى درباً نسير فيه مع من نحب نكون فيه كما نحن دون رتوش

لست مُجبره أن أنتظر أحد اليوميين 14/2 او 5/11 لأقول لأى كائن أنى أحمل له حباً ( والحب أنواع رغم أن المُسمى واحد) لما أكبت هذا داخلى إلى أن يأتى أحد اليومين...فرضاً وافتنى المنيه قبل هذا اليوم ؟؟!! فما العمل؟

وعلى الرغم من هذا وإقتناعى بأن عيدنا كمسلمين عيدان فقط هما عيد الأضحى المبارك وعيد الفطر... إلا أننى وقبل يوم الحب بيوم أقول لأفراد يعلمون جيداً أنى والله أحبهم فى الله .. أقول

إنى أحبكم فى الله إلى

1- زوجى فى المستقبل إن شاء الله :) وأهدى له هذا الدعاء ومن المؤكد أنه يعلمه جيداً
(اللهم وفقنا إلى مافيه رضاك .. وإبعدنا عما يغضبك .. وإجمعنا على الخير وتقواك.. ووفق خُطانا إلى مُبتغانا )

2- لإخواتى وأبى وأمى وأخُص بالذكر أخى الأكبر وأقولوا كل حب وإنت طيب ياراجل يا طيب ياللى عمرى معاك أحلى من الشهد

المدوب ;) ويبعد عنا العزول

3- لكل أصدقائى بدون ذكر أسماء

4- لكل زوار المدونه الغلبانه دى

وأخيراُ .. وإن كانت تستحق ان تكون أولاً لأنها هى الملكه التى علمتنى أصول الحب والحنان والعطاء ومعنى الأمومه والجده وأطلب منكم قراءة الفــاتحه لها والدعاء لها بالرحمه والمغفره هى ( جدتى ) الغاليه ادعو الله أن يرحمها ويجزيها خير الجزاء

ولتختم بالأتى ,,

على الحب تلاقينا

وبالحب تصافينا

وفوق حطام الحياه تعالينا

لأننا بك ربنا إهتدينا

تعيش كلية الأداب جامعة الإسكندريه .. تعيش .. تعيش.. تعيش

يمكن تفاهه.. ويمكن هيافه .. يمكن اى شئ .. ولكنه وعد ووعد الحر دين عليه

طبعاً كل الكليات بدأت دراسه يا حرام وكل المدارس.. صعبانيين عليا وإنتوا بداتوا الهم بدرى كدا.. قبل التعليق وتقولولى ما إنتى فى كليه زينا وأكيد بدأتى .. هنا سأدلى لكم بالصدمه وسأقيم الاحتفاليه العُظمى وأقول لسيادتكم الأتى:

-أنا فى كليه زيكم أه

-ولسه ماخلصتش أهلكن كليتى المدلعه الحساسه إللى حاسه بينا وإننا مالناش نفس للدراسه قد قامت بتأجيل الدراسه إسبووووع كامل عِلماً بأن هذا فى كلية أداب جامعة إسكندريه فقط لا غير... معلش بقى الناس مقامات

بس بس بلاش الحقد الدفين ده اللى سمعتوا فى صوت إيمان وهى بتبلغنى وفى صوت سميه وانا ببلغها حاقدين

بصوا رغم كل المأخذ اللى أنا واخداها على الكليه

ورغم كل مشاعر الكراهيه المفاجأه تجاههاورغم إنى أصلا السنه دى تقريبا ماروحتهاش

ورغم الاكتئاب اللى جالى منها ومن القيم ومن الناس وخلانى أنام اليوم كلوا وما احسش بمرور الأيامورغم إنها بتترمم وبردوا وحشه

ورغم الكتب اللى بنستلمها متاخر والغباء اللى وصلتلوا بسببها وبقيت ولا عاوزه دكتوراه ولا زفت

ورغم الاستغلال الشنيع الموجود فى الكليه وكل حاجه بفلوس وده مختلف عن باقى الكليات التانيه

ورغم حياة المصلحه الموجودهورغم إننا بنأخد المحاضرات فى غرفه غير أدميه لا تستوعب أكتر من 30 طالب وبيقعدوا فيها اكتر من 200 طالب وطالبه !!! إزاى مش عارفه بجد بس ده اللى بيحصل وبيبقى فى بنات متعقله على الشبابيك (منظر غير ادمى ولا حضارى) بس بردوا واخدين أجازه إسبوع وإنتم لأ

ورغم د/مجدى اللى بدعيلوا إن ربنا يمنحوا صوت عالى او حنجرة أم كلثوم أو يمنحوا المزاج اللى يخليه يمسك المايك ويشرح فيه بدل ما إحنا بنفضل طول المحاضره بنخمن الكلام.. ويااااااااااااارب يا يدينا المنهج من جوه الكتاب او من المحاضرات او يكونوا الاتنيين مرتبطين ببعض مش يكون الكتاب فى وادى والمحاضرات فى وادى تااااااااانى خالص... بجد بدعيلوا بحاجات كتير ومش هو وبس علشان ما اكونش مفتريه عليه

بدعى كمان ل د/ عفاف ربنا يهديها كدا وينفخ فى صورتها وتدخل تشرح المنهج بدل ماهى تيجى محاضرهواحده أخر التيرم وتقول المقرر( اللى أصلا ما أخدنهوش ولا إتشرح) وتقول ذاكره والمطلوب إننا نكون عباقره ونفهم لوحدينا ..لأ وكمان فى الامتحان بتتامر .. بتغيظنى

ولا أنسى أبدا بالذكر د/ مايسه تلك العجوز الشابه وأقولها بالراااااااااااحه عليا وإنتى بتصححى ورقة إمتحان الانجليزى بتاعتى لأنى تقريبا جاوبت ال 1/4 بس فأنا موافقه بالمقبول أو زكى عن صحتك وادينى جيد موافقه او زكى عن صحة الدكاتره كلهم وتنازلى ودينى امتياز مش حقولك لأ وأنا كرماكى أهواه واقولها كمان يه المشكله لما اللى يتاخر 5 دقائق يدخل ما انتوا لما تتأخروا ساعه ويمكن اكتر بنفضل مستنيينكم وندعى بالفرج

بجد مش عارفه أفتكر مين ولا مين أصل المأخذ كتير .. بس أعتقد كفايا كدا مش حفضح ومش حتكلم عن شئون الطلبه اللى بقالهم 3 شهور بيعملولى رقم الجلوس والكارنيه وما اخدوش لحد دلوقتى وإمتحنت بحتة ورقه معفنه مسمينها تصريح وكإنى داخله أزور واحد مسجون اسموا ورقة الامتحان !! اومال لو ماكونتش دافعه كل مستحقاتكم .. عموما خلاص المسامح كريم ده إنتى بردوا يا كليتى رافعه راسنا وعطيانا إسبوع أجازه وباقى الكليات تكاد تموت غيظا اصل الدكاتره عندهم نازلين سلخ فيهم من أول يوم

يلا يلا روحوا ذاكروا ولا ناموا بدرى علشان عندكم كليه الصبح (كايده العُزال أنا من يومى إيوه أه) سلام بقى

إغماءة الإمتحانات راحت .. ها إيه الذكريات

كل سنه وانتم طيبين لكل اللى خلصوا إمتحانات .. وإن شاء الله بالنجاح ونستقبل نتايج مُبهره

فعلا سعاده كدا وانا مخلصه امتحانات كنت بحسها بس السنه دى ماحسيتهاش .. يمكن لأنى ماحسيتش ان فيه امتحانات كتير؟ يعنى كانت لأول مره مستقبلانى حاله من النوم.. عارفه ان أصحابى وبالذات بسمه عانت منى .. واكيد حتدخل تحكى مادامت عرفت البلوج ..

عموما اكيد فى الامتحانات حصل مواقف كتيييييييييييييييييير تنسينا توتر الامتحان ونستغربها ... مش حطول عليكم

يلا كل واحده تحكى بقى .. وانا حبدأ بس فى الرد جوه ويمكن مش دلوقتى

أوكيتو حستنى التعليقات ومش شرط يعنى كون فى فترة دراسه يعنى الناس اللى اتخرجت اكيد فاكره مواقف ياريت تحكيها بقى ونودع النكد شويه

أوقات كثيراً ماتتكرر

أوقات كثيراُ ماتتكرر .. وليست بالغريبه عنى منذ شهور ليست بالقليله أجلس دون ترتيب مُسبق ... أجدنى أتساءل .. ماهذا اهذا بكاء أم ضحك؟!! أم ماذا؟؟

ماهذا التحول المُفاجئ فى الحاله المزاجيه؟

ماهذا الخراب الداخلى ؟

ماهذه الفوضى التى أشعر بها؟

ماهذا التناقض بين السلوك والمشاعر؟

ماهذه الأنثى التى أصبحتُ أنا هى؟ وأين أنا منها؟

ماهذا الوجه الذى أراه فى المراَه؟ لن أُبالغ حين أقول اننى أصبحت أكرهه لما بهِ من كأبه إرتسمت عليه...!

ليس وجهى محط حديثى ولكن حديثى عن مابداخلى .. وعن هذه الحالات المفاجئه من الفرح الزائد ودون معنى أو موقف يحتاج لهذا وعن الحزن الزائد وبلا أسباب ....!! أهذا الحزن ضمن البُكاء على الأطلال؟!!!!

يا الله .. ياسذاجتى التى اصبحت أكرهها وأكره ذاتى ... اللعنه على تلك السذاجه الملعونه ... إلى متى سأظل هكذا؟!!

إلى متى سأظل أذكٌر أن الطيور إذا هاجرت من أوطانها حتماً ستعود سوماُ حامله لأوطانها كل معانى الحب والوفاء والإحتياج...!!

... ولكن ماذا يفعل الوطن إن لم تعود له طيوره؟أيظل الوطن يعيش هذا الإحساس المرعب وهو ينظر لتلك الطيور يحصى ويتحسس صمتهم ونظراتهم وعباراتهم .. ينتظر منهم قرار الحياه به إما بدايه تمنح الحياه للوطن وتخلصه من الخراب وتلك الخفافيش التى تعيش به أو نهايه تجعل الوطن يُصاب بالذهول ويحيا مثلى ..!!!

إنتظر أيها الوطن وسأنتظر معك .. وسيحكم الزمن والقدر علينا ..

ولكن ماذا سيكون حكم القدر علينا !! هل ستعود الطيور المغتربه؟ أم سنحيا مع الخفافيش " ونكمل حياتنا " !!! هل الحياه مع الخفافيش حياه !!

وهنا تُجيب الطيور : لا تتساءل أيها الوطن الغبى عليك فقط إكمال حياتك كما طلبنا منك ...

اكمل حياتك بدوننا .. وإلا سيكون التخلص منك هو الحل...

وهنا يتلعثم الوطن ويحاول ان يستعطفهم ويُذكرهم بما أخذوه من خير الوطن .. ولكن تقاطعه الطيور قائله: لا تحزن أيها الوطن وتساءل كيفما شئت .. ولكن لن نجيبك تعلم لما ؟! لأن مصيرك معنا ماهو إلا عمليه بسيطه وهى

Block + Delete